Umarangkada na nitong Lunes, Nobyembre 15, ang pilot implementation ng face-to-face classes sa may 100 pampublikong paaralan sa bansa.
Gayunman, wala pa umanong paaralan sa National Capital Region (NCR) ang kabilang sa nabanggit na balik-eskuwela.
Ikinatwiran ni Department of Education (DepEd) Assistant Secretary Malcolm Garma, wala pa silang napipiling paaralan sa Metro Manila upang lumahok sa dry run.
Tiniyak naman niya na patuloy silang nakikipag-ugnayan sa 17 na alkalde sa Metro Manila upang matukoy ang mga naturang paaralan.
Gatchalian kay Guo: 'See you tomorrow, sana magsabi ka na ng totoo!'
Target aniya nila na makakuha ng kahit isang paaralan sa bawat Metro Manila area na mailahok sa pilot run ng face-to-face classes.
“So 'yan muna ang titingnan natin at pag-uusapan natin, kung ano 'yung aktuwal na bilang na maisasama natin sa pilot face-to-face sa National Capital Region,” ani Garma sa isang television interview.
Matatandaang 100 paaralan ang paunang pinayagang makalahok sa pilot face-to-face classes simula nitong Lunes, sa mga lugar na low risk sa COVID-19 at ipinagpapalagay ng DepEd at ng Department of Health (DOH) na ligtas sa COVID-19.
Inaasahan namang 22 ring pribadong paaralan ang lalahok sa pilot run simula naman sa Nobyembre 22.
Mary Ann Santiago
