GANAP na maangkin ang ikatlong playoffs berth sa Group A ang tatangkain ng Asia's Lashes habang mapalapit naman sa inaasam na playoffs slot ang hangad ng mga kagrupo nilang iWalk at AMA Online Education sa pagsalang nila ngayong hapon sa 2019 PBA D League Foundation Cup sa Ynares Sports Arena sa Pasig.

Nasa solong ikalawang puwesto taglay ang barahang 3-2, kasunod ng mga unbeaten teams Marinerong Pilipino at Centro Escolar University (5-0), isang panalo na lamang ang kailangan ng Asia's Lashes upang pormal na sumulong sa quarterfinals.

Nakabuntot naman sa kanila at magkasalo sa ikatlong puwesto hawak ang parehas na barahang 2-3 ang Chargers at ang Titans.

Makakasagupa ng Asia's Lashes sa unang laro ganap na 1:30 ng hapon ang iWalk habang makakatunggali ng AMA ang Hazchem sa susunod na laro ganap na 3:30 ng hapon bago ang huling laban ganap na 5:30 ng hapon sa pagitan ng Italiano's Homme at Hyperwash.

'Pikon daw?' UAAP fan na nag-dirty finger, agaw-eksena sa San Juan Arena!

Manggagaling ang Asia's Lashes sa 108- 98 na panalo kontra Hazchem sa nakaraang huli nilang laban habang magbubuhat naman sa 97-141 kabiguan sa kamay ng Marinero ang iWalk parehas noong Agosto 26.

Samantala sa huling laban, kapwa palalakasin ng Hyperwash at Italiano's Homme ang tsansa nila na makasingit sa huling dalawang playoff slots sa Group B.

Tatangkain ng Hyperwash (2-2) na tumabla sa Black Mamba(3-2) sa ikatlong puwesto habang magsisikap naman ang Italiano's na umangat mula sa kasalukuyang markang 1-2.