Makamit ang ikalawang playoff berth sa Group B at mapanatili ang malinis nilang marka ang tatangkain ng BRT-Sumisip Basilan-St.Clare sa muli nilang pagsabak ngayong hapon sa pagpapatuloy ng 2019 PBA D League Foundation Cup.

Nakatakdang makasagupa ng Saints sa unang laro ngayong 1:30 ng hapon ang McDavid-La Salle-Araneta sa pambungad na laban ng nakatakdang tatlong salpukan sa Filoil Flying V Center sa San Juan.

Huling tinalo ng koponan para sa ikatlong sunod nilang tagumpay ang Hyperwash noon pang nakaraang unang araw ng buwan sa iskor na 129-72.

Pinapaboran sila kontra McDavid na naghahangad namang makasilat upang makatikim ng unang panalo matapos ang tatlong sunod na kabiguan.

Muntik mag-suntukan! Beermen vs Taoyuan, nagkainitan sa PBA-EASL

At kung muling magwawagi, makakahanay sila ng nauna ng quarterfinalist sa grupo na Technological Institute of the Philippines (5-1) at mananatili pa sa kanilang pamumuno.

Parehas namang naghahangad na makamit ang nalalabing dalawang playoff berths sa Group A, tatangkaing ipanalo ng iWalk at Asia’s Lashes ang kani-kanilang laban ngayong hapon.

Kasalukuyang magkasalo sa ikalawang posisyon hawak ang patas na barahang 2-2, panalo-talo, sasalang ang dalawang koponan sa huling dalawang laro, ang iWalk kontra Marinerong Pilipino ganap na 3:30 ng hapon at ang Asia’s Lashes laban sa Hazchem ganap na 5:30 ng hapon.

Bagama’t, nakakasiguro na ng playoff berth at ng top 2 finish para sa twice-to-beat incentive, tiyak na hindi pa rin basta pagbibigyan ng Skippers ang Chargers upang manatiling walang bahid ang kanilang rekord.

Sa huling laban, magtatangka naman ang baguhan ding Hazchem (1-2) na patuloy na palakasin ang tsansa nila para sa dalawang natitirang quarterfinal slots.

-Marivic Awitan

Mga Laro Ngayon

(Filoil Flying V Center)

1:30 p.m. - BRT Sumisip Basilan-St. Clare vs McDavid-La Salle Araneta

3:30 p.m. - iWalk vs Marinerong Pilipino