Watanabe, asam ang ika-5 ginto para sa Team Philippines

JAKARTA – Hindi pa tapos ang selebrasyon ng Team Philippines sa 18th Asian Games.

May pagkakataon si Kiyomi Watanabe na madugtungan ang hakot sa gintong medalya sa lima sa pagsabak sa championship round ng women’s -73 kg ng judo. Nakatakda ang laban ganap na 5pm ng Huwebes.

Akari Sports wala pang balak pasukin ang PBA

Makakaharap ng 22-anyos Filipino-Japanese sa gold medal match ang mahigpit na karibal na si Japanese Nami Nabekura, gumapi sa Pinay judoka sa Asian Championship finals sa nakalipas na taon.

“She is ready and determined to give another gold medal for the Team Philippines. Kabisado na niya ang istilo at diskarte ng kalaban niya, hopefully, makabawi siya rito,” pahayag ni Philippine Sports Commission (PSC) Commissioner Ramon Fernandez.

Kabilang si Watanabe sa ‘priority athletes’ na tinutukan ng PSC sa nakalipas na mga taon.

Umusad sa finals si Watanabe nang gapiin si Gankhaich Bold ng Mongolia sa semifinals. Nauna niyang napatalsik si Orapin Senatham ng Thailand sa quarterfinals kung saan awtomatiko siyang umusad matapos makakuha ng bye.

Anuman ang kaganapan, sigurado na si Watanabe para sa marka na unang Pinoy na nagwagi ng medalya mula nang maisama sa Asiad calendar ang judo noong 1986. Nalagpasan din niya ang ikapitong puwesto na pagtatapos sa 2014 Asiad sa Incheon.

Hindi naman pinalad ang mga kasangga niyang sina SEA Games gold medalist Mariya Takahashi, nabigo sa women’s -63kg quarterfinals at repechage, habang natalo si Keisei Nakano sa men’s -73kg round-of-16 at nasibak si Megumi Kurayoshi sa round-of-16 ng women’s -57kg.