LOS ANGELES AFP) – Dumagsa ang mga nagpoprotesta sa mga lansangan sa buong United States nitong Sabado, bitbit ang anti-Donald Trump placards para sa ikalawang araw ng Women’s March laban sa president -- eksaktong isang taon sa araw ng kanyang inagurasyon.

Daan-daan libo ang nagmartsa sa Los Angeles, New York, Washington, Chicago, Denver, Boston at iba pang mga lungsod sa buong bansa, na nakasuot ng pamosong pink knit ‘’pussy hats’’ -- tumutukoy sa videotape ni Trump na ipinagmamalaki ang lisensiya niya na hipuan ang mga babae nang walang pananagutan.

Nagtaas ang mga nagpoprotesta ng mga slogan gaya ng ‘’Fight like a girl’’, ‘’A woman’s place is in the White House’’ at ‘’Elect a clown, expect a circus.’’

Pinakamarami ang nagprotesta sa mga lungsod na mababa ang popularidad ni Trump sa mga survey: sinabi ng Los Angeles mayor na 600,000 ang nagmartsa sa lungsod, habang tinaya ng New York police ang halos 200,000 nagpoprotesta.

Kabilang sa mga nagsalita sa rally sa New York ang aktibista at aktres na si Rosie Perez at entertainer na si Whoopi Goldberg, na binigyang-diin na ‘’we are here to say -- as women -- we’re not taking it anymore.’’