Nakopo ni Jade Charito Capadocia ang premier girls’ 18-under singles title, habang nasungkit ni top seed Miles Vitaliano ang dalawang age-group title sa Manila leg ng 18th HEAD Graphene XT Junior Tennis Satellite Circuit kamakailan sa Rizal Memorial Tennis Center.

Ginapi ni Capadocia, nakababatang kapatid ni dating RP No.1 at veteran internationalist Marian, si No. 1 seed Melanie Faye Dizon, 3-6, 6-4, 6-4, para makopo ang kampeonato sa huling torneo ng serye na inorganisa ng Dynamic Sports.

Naungusan naman ni Vitaliano si No. 2 seed Macie Carlos, 6-1, 6-2, sa girls’ 14-and-under singles crown bago pinabagsak si Dizon via retired sa girls’ 16-and-under finals.

Pinataob naman ni second seed Adeline Abadia si Khryshana Brazal, 6-4, 6-3, para sa korona ng girls’ 12-and-under class.

Rebisco, DepEd nagkasundo sa pagbuo ng volleyball program katuwang ang Creamline

May kabuuang 500 player mula sa iba’t ibang collegiate league at tennis club ang sumabak sa torneo na sanctioned ng Philippine Tennis Association (Philta).

Sa boys’ division, nagwagi si Eduardo Bagaforo kontra top seed Jeremiah Macias, 6-4, 1-6, 6-2, para sa kampeonato ng 18-and-under class, habang nanaig si top seed Jed Justin Labasano kontra Al Francis Andrade, 6-4, 6-0, sa 16-and-under diadem.

Naungusan ni Jan Harold Trillanes si Matthew Garcia, 6-4, 1-6, 7-5, sa 14-and-under crown, habang naiuwi ni Jude Miguel Hidalgo ang 12-under title kontra Juan Rafael Mendoza, 6-2, 7-5.

Nakamit ni Sherwin Rey Nuguit ang 10-under unisex title laban kay Mica Ella Emana, 4-1, 4-1.