Magpapatupad muli ang Department of Public Works and Highways (DPWH) ng road re-blocking sa ilang lugar sa Metro Manila, kaya asahan ang matinding traffic ngayong weekend.
Sa abiso ng Metropolitan Manila Development Authority (MMDA), sa rekomendasyon ni DPWH-National Capital Region Director Melvin Navarro, apektado ng road re-blocking ang southbound lane ng EDSA, sa pagitan ng Mother Ignacia at Eugenio Lopez Streets sa unang lane mula sa sidewalk nito, bahagi ng C-5 Road, mula sa Shell Gas Station hanggang sa SM Warehouse Gate 2, outermost lane sa northbound lane, at ang bahagi ng EDSA sa harap ng DPWH-QCSED, second lane mula sa sidewalk.
Sinimulan ang proyekto dakong 10:00 ng gabi nitong Biyernes at maaari nang madaanan ng motorista ang mga lugar dakong 5:00 ng umaga bukas, Lunes, Enero 11.
Pinayuhan ni MMDA Chairman Emerson Carlos ang mga motorista na iwasan muna ang mga apektadong lugar ngayong weekend upang hindi maabala ng traffic. (Bella Gamotea)
