NAGSAMA-SAMA ang mga bigating Kapamilya stars pati executives sa pagpapaabot ng pasasalamat sa pagmamahal sa pamamagitan ng pagpapasaya sa milyun-milyong tagasuporta sa Kapamilya, Thank You For The Love: The ABS-CBN Christmas Special na ipapalabas ngayong Sabado at Linggo (Dec 19 & 20).
Pinangunahan ng love teams nina Daniel Padilla at Kathryn Bernardo, Enrique Gil at Liza Soberano, at James Reid at Nadine Lustre ang pagpapadama ng pag-ibig sa taunang ABS-CBN Christmas Special na ibinida ang kahalagahan ng pagpapasalamat at pagmamahalan na isinasalamin ng tema ng Christmas station ID ng Kapamilya network.
“Ang Pasko at Bagong Taon ay mas maganda pang pakinggan ‘pag dudugtungan natin ng maraming salamat. Dahil sa pagmamahal ng Diyos sa atin, may pagmamahalan tayo sa isa’t isa, kaya nararamdaman natin ang tunay na diwa ng Pasko,” ani ABS-CBN Chairman Eugenio “Gabby” Lopez III sa Christmas special.
Classic movie ‘Ipaglaban Mo!’, ipinalabas ng CCP bilang kampanya vs VAWC
Ipinaliwanag din ni ABS-CBN President/CEO Charo Santos-Concio kung bakit pag-ibig ang diwa ng Pasko. Aniya, “Ang Pasko o ang kapanganakan ni Jesukristo ang pinakadakilang paraan ng Diyos upang ipadama sa atin na lahat tayo ay mahal niya ng walang hanggan. Kaya’t sana, walang tigil din tayong magmahalan at magpasalamat sa bawat isa.”
Umaapaw din sa pag-ibig at saya ang Christmas special dahil sa iba’t ibang nakakaaliw at nakakakilig na production numbers ng Kapamilya stars.
Ilan sa mga natatanging performance sa Christmas special ay ang pagpapakilig ng Kapamilya leading men na pinangunahan nina Piolo Pascual at John Lloyd Cruz; ang duet ng Ang Probinsyano stars na sina Coco Martin at Simon Pineda; ang engrandeng Your Face Sounds Familiar production number; ang circus-inspired performance ng It’s Showtime family; ang global Pinoy pride tribute nina Gary V. at Bamboo sa mga Pinoy na nag-iwan ng marka abroad; at ang espesyal na back-to-back performances ng cast ng All You Need is Pag-Ibig at Beauty and the Bestie, at ang nakakaantig na sorpresa ni Vice Ganda sa kanyang ina.
Huwag palampasin ang lahat ng performances ng paboritong Kapamilya stars sa Kapamilya, Thank You For The Love: The ABS-CBN Christmas Special ngayong Sabado at Linggo sa ABS-CBN.
