ISANG gabi noong nakaraang taon, na-stranded ang isang bagong kasal sa isang masukal na kalsada dahil sa malakas na buhos ng ulan. Hindi na nila magawang patakbuhin pa ang sasakyan kaya’t lumabas sila mula rito at tumakbo patungo sa isang munting bahay.
Nang sila’y makarating sa bahay, nakilala nila ang isang matandang mag-asawa. Ipinaliwanag nila ang nangyari sa kanila at tinanong ng lalaki ang dalawang matanda na may-ari ng bahay: “Maaari ba kaming magpalipas ng gabi dito kasama kayo? Puwede kaming matulog sa sahig o sa silya.”
Dahil sa nalamang kalagayan, sinabi ng matandang babae na, “Bakit naman hindi. May isa pang bakanteng kuwarto.”
Kinaumagahan, maagang gumising ang bagong kasal at naghandang umalis nang hindi naiistorbo ang matandang mag-asawa.
Tahimik silang nagbihis, naglagay ng P500 sa tokador ng dalawang matanda, at dahan-dahang bumaba ng hagdan. Nang kanilang buksan ang pintuan sa sala, natagpuan nila ang matandang mag-asawa na natutulog sa upuan. Nalaman nilang inilaan sa kanila ng dalawang matanda ang nag-iisang kuwarto sa naturang bahay.
Ang unang aral na mapupulot sa istorya ay hindi mo kinakailangang maging mayaman upang makatulong sa mga taong nangangailangan. May mga taong nagsasabing, “Tutulong ako sa iba kapag naging mayaman na ako o kaya ay kapag nanalo ako sa lotto”
o “kapag natanggap ko na ang aking pension.”
Ang tanong, paano kapag hindi ka naging mayaman o hindi ka manalo sa lotto o kaya ay namatay ka bago magretiro sa trabaho, ibig sabihin hindi ka tutulong sa iyong simbahan o sa mga kapos-palad?
Mayaman man o mahirap, hinihinmok tayong maging matulungin sa mga nangangailangan ayon na rin sa turo ng Panginoon.
May ilang mga tao, halimbawa, na nagdo-donate ng mga gamit na bagay sa mga mahihirap o biktima ng mga bagyo. Ayos lang ‘yon. Ngunit ang iba ay naghahandog ng ilang bagay na hindi na halos maaaring gamitin. Ang sapatos ay may butas at ang mga damit ay parang basahan na at may amoy pa.
PARA SAAN? Kapag nag-donate tayo ng pera sa isang charity, ano ang tunay nating motibo? Ito ba ay dahil nais nating makilala ang pangalan natin, ng ating pamilya o ating kinabibilangang kumpanya? Nagdo-donate ba tayo sa charity dahil ito ay “tax deductible”? O kaya naman, nagbibigay tayo ng regalo sa ating boss dahil may nais tayo kapalit tulad ng pagtaas ng suweldo o promotion?
Ayon sa itinuro sa atin, “When you give something to a needy person, do not make a big show of it as the hypocrites do” (Mt 6,2). (Fr. Bel San Luis, SVD)
