Hinimok ng Philippine National Police (PNP) noong Martes ang publiko, lalo na ang mga nasa Metro Manila, na huwag mag-panic sa gitna ng kumakalat na text messages tungkol sa diumano’y mga planong pambobomba sa metropolis.

Sinabi ni Chief Supt. Generoso Cerbo Jr., tagapagsalita ng PNP, na wala silang natatanggap na anumang ulat tungkol sa anumang planong pagpapasabog na tumatarget sa mga istasyon ng Metro Rail Transit at iba pang mga publikong lugar sa Pasig, Makati, Quezon City at Taguig.

Pinapayuhan ng SMS (short messaging system) ang mga tao na umuwi nang maaga at iwasan ang matataong lugar gaya ng MRT stations at mga mall, tinukoy ang intelligence information tungkol sa bombing plot sa apat na lungsod.

“Our intel unit has monitored a Muslim group that is behind this and possibly hiding in Maharlika Village in Taguig,” ayon sa kasunod na text.

Ang text message, ipinapalagay na nagmula sa intel operatives ng gobyerno, ay nagsasabing ang intelligence units ng pulisya at militar ay mahigpit na sinusubaybayan ang planong pambobomba.

Imbes na mabahala sa diumano’y plano, pinayuhan ni Cerbo ang mamamayan na maging mapagmatyag, binigyang diin na madalas samantalahin ng mga teroristang grupo ang takot ng publiko.