Inihayag ng Philippine Atmospheric, Geophysical and Astronomical Services Administration (PAGASA) nitong Martes, Mayo 14, na ang frontal system at easterlies ang kasalukuyang nakaaapekto sa bansa.
Sa tala ng PAGASA kaninang 4:00 ng madaling araw, inaasahang makararanas ng maulap na kalangitan na may kalat-kalat na pag-ulan ang mga lalawigan ng Batanes at Cagayan dulot ng frontal system, o ang weather system kung saan nagsasalpukan ang mainit at malamig na hangin.
Pinag-iingat ang mga residente sa mga nasabing lugar sa posibleng pagbaha o kaya nama’y pagguho ng lupa tuwing magkakaroo ng malalakas na pag-ulan.
Samantala, patuloy pa rin daw na nakaaapekto ang easterlies, o ang mainit na hanging nagmumula sa karagatang Pasipiko, sa Metro Manila at mga natitirang bahagi ng bansa.
ALAMIN: Mga sintomas ng heat-related illnesses at mga dapat gawin kapag nakaramdam nito
Kaugnay nito, inaasahan umanong patuloy na magiging mainit ang panahon, na may tsansa pa rin ng pulo-pulong mga pag-ulan at thunderstorms pagsapit ng hapon o gabi.
Sa kasalukuyan ay walang binabantayan ang PAGASA na alinmang bagyo o low pressure area (LPA) sa loob o labas ng Philippine area of responsibility (PAR).
