Hindi lilipat si dating Speaker Alan Peter Cayetano sa Minority bloc sa Kamara, at sa halip lumagda pa sa isang manifesto ng Nacionalista Party (NP) na naghahayag ng suporta sa bagong Speaker na si Rep. Lord Allan Velasco.
Sinabi ni Surigao del Norte Rep. Robert Barbers, isang NP leader noong Huwebes, walang katotohanan na lilipat sa Minorya si Cayetano matapos mapatalsik sa puwesto noong Martes.
“There is no truth to the rumor that we will become minority,” ani Barbers, nagsabi ring ang 44 NP members sa Kapulungan, kabilang si Cayetano at ang kanyang asawa na si Taguig Rep. Lani Cayetano, ay lumagda sa manifesto.
Inalok ni Minority Leader Bienvenido Abante si Cayetano na maging miyembro ng Minorya. “I don’t think there’s a possibility that Speaker Alan will become a member of the minority. “It is very clear in our manifesto that as a block, as a group headed by former Speaker Alan, we are supporting Speaker Lord Velasco”, pahayag ni Barbers, chairman ng House committee on dangerous drugs.
