Ipinasa ng Kamara sa pangalawang pagbasa ang sertipikado bilang urgent na panukalang batas ni Pangulong Rodrigo Duterte o ang sinusugang House Bill 6953 (“Bayanihan to Recover as One Act”) nitong Miyerkules.
Layunin ng panukalang batas na bigyan P162 bilyong pondo ang gobyerno bilang subsidy para mapabilis ang pagbangon o recovery ng ekonomiya ng bansa na labis na pininsala ng Covid-19.
Binanggit ni Deputy Speaker Luis Raymund Villafuerte, Jr. na bagamat ang Bayanihan 2 Act ay may limitadong pondo, ang P162 bilyon ay malaki ang maitutulong sa ekonomiya ng Pilipinas, tulad ng paggamit sa COVID-19 testing, cash-for-work programs, repatriation at reintegration ng overseas Filipino workers, subsidiya sa transportasyon, turismo, Micro, Small and Medium Enterprises (MSMEs), gayundin sa agrikultura at informal sectors.
Bert de Guzman
