“INAARAL pa.”
Ito ang sagot sa amin ni Direk Connie Macatuno kung may sequel ang patok na digital movie nina Angel Aquino at Tony Labrusca, ang Glorious, na umani ng papuri nang ipalabas ito sa iWant kamakailan.
Inaaral kung may sequel o ibang kuwento ang pagbabalik-tambalan nina Angel at Tony? Sana sa mainstream na ipalabas at hindi lang sa digital.
Anyway, abala si Tony ngayon sa taping ng bagong teleseryeng Mea Culpa, na makakasama niya sina Jodi Sta. Maria, Bela Padilla, Kit Thompson, Sandino Martin, Ivana Alawi, at Ketchup Eusebio mula sa Dreamscape Entertainment, sa direksiyon ni Dan Villegas.
Jude Bacalso, nanindigang valid complaint pagtawag ng 'Sir' sa kaniya ng waiter
May offer pala ang ibang movie outfit kay Tony, pero ayon sa nakakuwentuhan naming taga-production ay hindi sila mabalikan ng manager ng aktor dahil may prior commitment siya sa Star Cinema, bukod pa sa sunud-sunod ang tapings nito sa bagong serye na ipalalabas na sa 2019.
Tinanong namin si Mario Colmenares, manager ni Tony, tungkol sa nabanggit na offer ng ibang movie outfit.
“Oo, marami kaso hindi kami makasagot kasi may tinatapos pang movie. Punumpuno si Tony, ayoko namang mag-commit tapos wala kaming maibigay na schedules, nakakahiya,” atwiran sa amin.
Kinumusta namin si Tony kung nagagawa pa niyang mag-malling pagkatapos ng aksidenteng masuntok siya sa nakaraang mall show niya sa Batangas.
“’Yun nga, gustung-gusto niyang mag-mall lang, hindi na niya magawa. Kasi kilala na siya. Dati-rati nakakapunta siya, lakad lang siya nang lakad, ngayon hindi na niya magawa. Ngayon ang daming tumatawag na ng name niya, ang daming nagpapa-picture. Okay naman ‘yun, kaso nagkukumpulan, siyempre nabubulabog ‘yung ibang tao sa mall,” kuwento ni Mario.
Nabanggit pa ni Mario na hindi mahilig dumalo sa party si Tony.
“Nu’ng Star Magic Ball nga, hindi um-attend, mas ginusto pang mag-taping. Ano kasi siya, mahiyain.”
Matipid daw si Tony sa pera, at sa katunayan, lahat ng ginagamit niya ay sponsored kaya nakakaipon ang aktor para mabili ang pinapangarap na bahay para sa pamilya.
“Matagal pa, malaki pa kailangan niya. Pero ngayon sa bahay na talaga sila nakatira, unlike before maliit lang,” kuwento ng manager ng aktor. “Masipag naman si Tony.”
Tinanong namin kung aware si Tony na may tsismis na gay siya.
“Oo, tagal namang isyu ‘yan, halos lahat naman ng bagong artista, sinasabihan ng bakla. Hindi naman siya affected kasi kilala naman niya ang sarili niya, tatawa lang ‘yun,” napangiting sabi ni Mario.
-REGGEE BONOAN
