Timbuwang ang isang carnapper habang nakatakas ang kasabwat nito matapos makipagbarilan sa mga rumespondeng pulis sa Parañaque City, kahapon ng madaling araw.
Dead on the spot ang hindi pa nakikilalang suspek, na nagtamo ng ilang tama ng bala sa katawan, habang patuloy na tinutugis ang kasabwat nito.
Kinilala naman ang biktima na si Reah Jornadal y Sarsia, 23, lady guard ng isang hotel resort and casino, at nakatira sa CP Sta. Teresa Bagong Bayan, Taguig City.
Sa ulat na ipinarating ni Chief Supt. Tomas Apolinario, Jr., director ng Southern Police District (SPD), hinarang ng mga suspek, magkaangkas sa motorsiklo, ang biktima, na sakay din sa motorsiklo, sa Poblete Compound, sa kahabaan ng West Service Road, Barangay San Valley, sa Parañaque City, dakong 1:45 ng madaling araw.
Romina, patuloy na kumikilos pahilaga; hindi na nakaaapekto sa Kalayaan Islands
Tinutukan umano ng baril si Jornadal at sapilitang kinuha ng mga suspek ang kanyang bag at motorsiklo, na sinakyan ng back rider suspect.
Nagsisigaw ang biktima at tiyempong nagpapatrulya sa lugar sina PO1s Mark John Fontehon, Francisco Bula at John Mark Oloa, kaya hinabol ang mga suspek hanggang sa nakorner ang isa sa mga ito.
Sa halip na sumuko, bumunot umano ng baril at pinutukan ng suspek ang mga pulis kaya napilitang gumanti ang awtoridad at tuluyang namatay ang suspek.
Narekober sa pinangyarihan ang bag at motorsiklo ng biktima, isang caliber .38 paltik, at apat na pakete ng umano’y shabu.
-Bella Gamotea
