Pinaalalahanan kahapon ng Department of Education (DepEd) ang mga pribadong paaralan na pinayagan nilang magtaas ng matrikula para sa School Year 2018-2019 na dapat na mapunta sa suweldo ng mga guro ang 70 porsiyento ng idinagdag sa kani-kanilang matrikula.
Ayon kay DepEd Undersecretary Tonisito Umali, nagpasya ang kagawaran na payagan ang mga pribadong paaralan na makapagtaas ng mula 5% hanggang 15% ng matrikula ng mga ito upang maging “competitive” ang sahod ng mga guro ng mga ito sa suweldo ng mga guro sa mga pampublikong paaralan.
Sinabi ni Umali na ang 20% naman ng tuition hike ay maaaring ilaan sa pagpapaganda sa school facilities, habang ang natitira pang 10% ay pinahihintulutang mapunta sa kita ng paaralan, o return of investment.
Matatandaang 170 pribadong paaralang elementarya at sekundarya sa National Capital Region (NCR) ang pinayagan ng DepEd na makapagtaas ng matrikular ngayong school year.
