MUKHANG pamilyar ngunit parang hindi rin ang lalaking nasa litrato. Inilarawan ng media ang nakasalamin na lalaki na “frail” at “unrecognizable.” Ang katanungan sa isang headline, “Is this the same Jet Li we all know?”
Naalarma ang fans sa litrato ng diumano’y martial artist at nagtanong tungkol sa kalusugan ng action star na si Jet Li, 55. Matagal nang kilala sa kanyang youthful looks at acrobatic moves sa ilang dekadang paggawa ng mga pelikula, nitong mga nakaraang taon ay nilabanan ni Li ang hyperthyroidism, isang kondisyon na nagdudulot ng pagkahapo at weight loss at dati nang nagbunsod ng mga haka-haka sa bumabagsak na kalusugan ni Li.
Iniulat ng South China Morning Post nitong Sabado na ipinagdarasal ng fans ang kanyang kalusugan matapos lumutang ang kanyang litrato, na ayon sa SCMP ay kuha sa isang temple sa Tibet at maraming beses nang nai-share. Ipinalagay ng iba na ang lalaki na pinaniniwalaan nilang si Li ay nagmukhang tumanda dahil sa masamang lighting o anggulo.
'Unbothered?' Karen Davila, nag-flex ng larawan kasama ang pamilya Laude
Sa video na ipinaskil sa official Instagram ni Li nitong nakaraang Disyembre, binati ng aktor ang kanyang fans ng happy new year.
Nitong Lunes, sinabi ng manager ni Li na si Steven Chasman, na ito ay bad photo lamang ng 55 anyos na aktor.
“He has hyperthyroidism that he’s been dealing with for almost 10 years. It’s nothing life-threatening and he’s dealing with it,” sinabi ni Chasman sa Washington Post, idinagdag na nakausap na niya ang assistant ni Li.
Sa loob ng maraming taon, si Li ay isa sa most electrifying martial arts actors sa buong mundo. Sumikat ang national wushu champion sa pelikula nang gumanap bilang ang legendary folk hero na si Wong Fei-hung sa Once Upon a Time in China series. Ipinamalas niya sa kanyang fight scenes, kahit na choreographed at kung minsan ay gumagamit ng wire tricks, ang fierce athleticism at fluidity of movement. Sunod siyang sumabak sa American at European productions sa mga pelikulang Romeo Must Die, The Expendables at Kiss of the Dragon, na ginapi ng kanyang character sa isang silid ang napakaraming French police. Kahit nagbibida na sa Hollywood, nagpatuloy si Li sa pakikipagtrabaho sa Chinese directors, gaya ni Zhang Yimou sa Hero.
Nasuring may overactive thyroid noong 2010, sinabi ni Li noong 2013 na hindi siya nakasisiguro kung makapagpatuloy pa siya sa pagtatrabaho ngunit determinadong makabalik, ayon sa Associated Press.
“I’m in pain, but I’m not suffering. I’m happy,” aniya, idinagdag na mayroon siyang gamot na iniinom.
Iniulat ng SCMP na nagsalita rin siya tungkol sa problema niya sa hita at likod mula sa ilang dekadang stunts at injuries sa kanyang mga pelikula.
Noong nakaraang taon, sinabi ng Beijing-born actor sa isang dinner para sa kanyang charity na One Foundation, na pabalik-balik ang kanyang sakit, ayon sa SCMP.
Ayon sa National Institute of Diabetes and Digestive and Kidney Diseases, nangyayari ang hyperthyroidism “when the thyroid gland makes more thyroid hormones than your body needs.”
Ang hormones na ito ang kumukontrol sa paggamit ng katawan sa energy “so they affect nearly every organ in your body, even the way your heart beats.”
Dati nang umugong ang mga espekulasyon sa kalusugan ni Li. Noong 2016, pinawi niya ang usap-usapang lumulubha na ang kanyang sakit at kailangan na niya ng wheelchair, nang sabihin sa isang Singaporean journalist na, “even my friends are concerned and are asking how I am,” ulat ng Straits Times.
“There is nothing to worry about my health,” aniya, nagbiro pa na, “I’m not sure which wheelchair company is putting out such news to sell more wheelchairs. Perhaps someone wants me to be a spokesman for their wheelchairs.”
Iniulat na nakatakda siyang gumanap bilang emperor ng China sa Disney’s live-action production ng Mulan, na nakatakdang ipalabas sa mga sinehan sa 2020.
Sinabi ni Li, batid marahil ang larger-than-life image na nahulma niya sa marami niyang papel sa mga pelikula, na sa pakikipaglaban sa sakit siya ay “just a regular guy.”
“I’m not Wong Fei-hung, I’m not Huo Yuanjia. I’m not a hero,” aniya, pinangalanan ang mga karakter na kanyang ginampanan. “I’m just like you.”
Nitong Lunes, tinawag ni Chasman ang coverage ng larawan na “sensationalism” at nagbahagi ng litrato ni Li na ayon sa kanya ay kinunan nito lamang nakaraang linggo.
-Washington Post
