Nakopo ni Chezka Centeno ang unang internasyonal title nang gapiin ang beterno at world champion na si Kelly Fisher ng Great Britain, 11-8, sa Amway eSpring International 9-ball Championship nitong Linggo sa Banqiao Gymnasium sa New Taipei City.
Hindi nataranta kundi nagpakatatag ang 16-anyos na si Centeno laban sa mas bihasang karibal at sa kabila ng paghahabol sa 1-5 iskor sa kanilang race-to-11 titular duel.
Huling naghabol sa iskor na 7-8 ang dalagita na si Centeno bago nito sinamantala ang pagkakataon sa ika-16th rack upang itabla ang laban bago walisin ang huling tatlong laro.
Filipino Olympian Hergie Bacyadan wagi kontra Chinese kickboxer; sinungkit gintong medalya
“I’m very happy to win my first championship in a world ranking tournament,” pahayag ni Centeno, produkto ng Philippine Sports Commission PNG.
Ang korona ay maagang regalo sa kaarawan ni Centeno na magdiriwang ng kanyang ika-17 taon sa Hunyo 30.
Unang nagawa ng 2015 Southeast Asian Games at World junior 9-ball champion na si Centeno na manguna sa Group B at ipagpatuloy ang kanyang pagwawagi sa knockout stage.
Tinalo nito ang Spaniard na si Amalia Matas sa Last-16 sa iskor na 7-1, si Li Yuan Jun sa quarters, 9-1, at Han Yu sa matira-matibay na semifinals, 9-8, upang tumuntong sa finals kontra sa beteranong si Fisher.
“She played great under pressure,” sabini Fisher.
“She’s a fantastic player and I’m looking forward to seeing more of her in the future,” aniya.
Si Amit, naging runner-up sa WPA tournament sa nakaraang taon, ay agad na napatalsik sa unang round pa lamang ng 24-player knock-out stage sa nalasap na 4-7 kabiguan kay Mei Lin Yun. (Angie Oredo)
