DIRETSAHANG inamin ni Kathryn Bernardo na wala siyang ibang maisip na puwedeng maging leading man niya kundi ang ka-love team niyang si Daniel Padilla. Sa Kapamilya actors, si DJ lang ang gusto niyang makapareha.
“Sa totoo lang naman, kasi sa ngayon talaga si DJ lang talaga muna. Halos lahat ng leading men sa ABS-CBN may kanya-kanya na silang kapareha, di ba?” balik-tanong ni Kathryn.
Ang love team nila ang isa sa pinakasikat na tambalan sa ngayon. Kaya hindi naiiwasan ang palaging pagkukumpara sa kanila sa ibang love team.
Agad binanggit ni Kath na hindi sila nati-threaten kahit kaninong love team pa sila ikumpara. Dahil naniniwala siya na may iba’t ibang ino-offer ang bawat love team, sa ABS-CBN man o ibang network.
'Unbothered?' Karen Davila, nag-flex ng larawan kasama ang pamilya Laude
Ang pakiusap niya, sana ay magrespetuhan ang bawat fan groups na may kanya-kanyang sinusuportahang love team.
“Iwasan sana nila ang magbangayan. At the end of the day, walang isyu dapat. Basta ang sa amin, ang motivation namin ni DJ na dapat ‘yung mga taong sumusuporta sa amin, eh, hindi sila mawalan ng dahilan para suportahan kami,” seryosong lahad ng dalaga.
Ayon naman sa masugid na mga miyembro ng KB Buddies ni Kathryn, hinding-hindi sila magbabago para sa idolo nila.
“Sa totoo lang din naman, ‘yung pakikitungo naman namin ni DJ sa kanila, eh, laging totoo at sinsero at ‘yun din naman ang pangako namin sa kanila na hindi kami magbabago para sa kanila. Kung ano ang nakikita nila ngayon sa pakikitungo namin ni DJ sa kanila, eh, ‘yun ang totoo,” reaksiyon ni Kath.
Hindi lang pala mga kasing edad nila ni DJ ang fans nila, may mas nakatatanda at may mas bata pa sa kanila.
“Kaya nga sa plano namin ni DJ with regards sa pagtanggap ng mga matured roles, eh, napag-usapan namin na kapag mature roles na ‘yung gagawin namin, dapat mauunawaan at makakasabay ang mga supporters namin.
“Ayaw naming mabigla agad sila sa mga roles o projects namin. Gusto naming sabay silang mag-grow sa aming dalawa,” sey ng magandang young actress.
Samantala, hindi naiwasang maitanong kay Kathryn ang pag-eendorso nila sa Mar Roxas at Leni Robredo team.
“Sa amin naman, eh, kailangan lang po respetuhin natin ang isa’t isa lalo na sa kung sino ang pinili nating kandidatong sinusuportahan,” paliwanag niya. (JIMI ESCALA)
