Nais ng mga maralitang residente sa Valenzuela City na repasuhin ng mga konsehal ang ordinansa na nagbabawal na lumantad sa mga pampublikong lugar ang mga walang suot na pang-itaas o nakahubad-baro.

Anila, paninikil sa estado ng kanilang pamumuhay ang Ordinance No. 19 series of 2008 na iniakda ni First District Councilor Rovin Feleciano, na pinagtibay nina Councilors Tyson Sy, Lorie Natividad-Borja at Charee Pineda.

Tanging sina Councilors Lotlot Esteban-Cayco at Mar Morelos ang kumontra sa nasabing ordinansa, na nagpapataw ng multang P250 o pagkakakulong ng 30 araw sa sinumang lalabag.

Ang mga pulis, mga opisyal ng barangay, at Mayor’s Action Force ang magpapatupad ng nasabing ordinansa.

Hinaing ng mga residente, ang pagtambay nang nakahubad-baro sa labas ng kanilang bahay ang tanging solusyon para mapawi ang init, lalo na ngayong summer.

Kamakailan lang ay hinuli ng mga pulis ang apat na lalaki na nakahubad-baro habang nagpapahangin sa labas ng kani-kanilang bahay sa Gen. T. De Leon. (Orly L. Barcala)