SABI na nga ba’t mapapalitan pa rin ang title ng Star Cinema movie nina Batangas Gov. Vilma Santos, Xian Lim at Angel Locsin dahil sa showing ng movie sa January 27, hindi na The Caretaker o All of My Life ang title nito. Sa napanood naming trailer ng movie sa YouTube, Everything About Her na ang title ng movie.
Maganda ang sana ay final title na ng movie, bagay kay Gov. Vi at very Hollywood ang dating para sa amin. Tunog foreign movie, hindi tunog kanta (kung may song man na ganito ang title).
Malakas ang dating ng trailer ng Everything About Her, na gumaganap si Vilma sa role ng isang CEO, anak niya si Xian at private nurse naman niya si Angel. Magkakakanser si Vilma at may eksena na para siyang si Sen. Miriam Santiago na matapang na lalabanan ang sakit.
Ang ganda ng mga eksena nina Vilma at Angel, gaya noong sabunutan at saktan ng una ang huli, ‘yung tanungin ni Vilma si Angel kung gusto ang anak niya. Ang pinakagusto naming eksena ay nang sumuka si Vilma sa kanyang Hermes bag dahil iyon ang mabilis na nailapit ni Angel. Ang dialogue ni Vilma, sa susunod, sa Balenciaga bag niya naman siya susuka.
