Suspendido ang railway services sa Metro Manila nitong Linggo matapos na itaas ng Philippine Atmospheric, Geophysical and Astronomical Services Administration (PAGASA) sa Signal No. 4 ang rehiyon dulot ng pananalasa ng bagyong ‘Rolly’.
Sa abiso ng Department of Transportation (DOTr), suspendido ang mga biyahe ng Light Rail Transit Line 1 (LRT-1) at Line 2 (LRT-2), gayundin ang biyahe ng Metro Rail Transit Line 3 (MRT-3) at Philippine National Railways (PNR) dahil sa posibleng impact ng bagyo.
“In line with the latest severe weather bulletin issued by PAGASA placing Metro Manila under Signal Number 4, please be informed that LRT-1, LRT-2, and MRT-3 will suspend their respective operations effective immediately. PNR is likewise preparing for suspension of operations,” anang DOTr.
Bago naman tuluyang sinuspinde ang operasyon ay inihatid na muna ng mga naturang railways ang mga pasahero at mga empleyado na nakasakay na ng tren, sa kani-kanilang mga destinasyon.
Binatilyong hiniwalayan umano ng jowa, nagpatiwakal!
“In line with the government’s weather bulletin and DOTr announcement, LRT-1 is suspending train operations effective immediately due to Typhoon Rolly. Please follow us for updates. Keep safe everyone!” anang LRT-1.
“Sususpendihin ng pamunuan ng MRT-3 ang operasyon ng mga tren nito ngayong araw, ika-1 ng Nobyembre 2020, bilang pag-iingat sa pagpasok ng Bagyong Rolly sa bansa. Itinaas na rin sa Signal #4 ang buong Metro Manila. Mula sa pamunuan ng MRT-3, STAY HOME AND STAY SAFE!” anunsiyo naman ng MRT-3.
-Mary Ann Santiago
