TARGET ng University of Santo Tomas na maipagpatuloy ang impresibong kampaya sa pakikipagtuos sa Adamson ngayon sa pagpapatuloy ng UAAP Season 82 Men’s Basketball Tournament.

Hawak ang kartadang 3-1, haharapin ng Tigers ang Falcons sa ikalawang laro ganap na 12:30 ng hapon sa hangad na manatiling nasa NO.2 sa likod ng defending champion at wala pa ring talong Ateneo de Manila (4-0)

Huling ginapi ng Tigers para sa kanilang bounce back win pagkaraang mabigo sa ikatlo nilang laban kontra sa Blue Eagles ang National University Bulldogs, 87-84 noong nakaraang Linggo sa overtime.

Sa kabilang dako, sumadsad naman ang makakatunggali nilang Falcons sa ikalawang dikit nitong talo makaraang ungusan ng Univ of the Philippines nito ring Linggo, 83-82.

'Aapela raw!' John Amores 'di tanggap pagkawala ng professional license?

Lumupaypay ang bagwis ng Falcons partikular sina Jerrick Ahanmisi at Jerom Lastimosa matapos silang talunin ng Maroons na umabante sa pinakamalaking bentahe na 16 puntos sa regulation.

Mauuna rito, magtutuos sa pambungad na laro ng nakatakdang 3-game bill ang pumapangatlo ngayong University of the Philippines (2-1) at winless pa ring National University (0-3)ganap na 10:30 ng umaga habang maghaharap naman sa tampok na laban ang Far Eastern University at De La Salle ganap na 4:00 ng hapon.

-Marivic Awitan

Mga Laro Ngayon

(Mall of Asia Arena)

10:30 n.u. -- UP vs NU (Men)

12:30 n.h. -- AdU vs UST (Men)