Hinimok ng isang opisyal ng Commission on Elections ang taumbayan na tumulong sa kanila sa pagtiyak na magiging malinis ang halalan sa Mayo 13.

Aminado si Comelec Commissioner Rowena Guanzon na hindi nila kayang bantayan ang lahat ng kandidatong lumalabag sa batas ngayong campaign period, kaya umaapela sila ng tulong mula sa mamamayan.

Ayon pa kay Guanzon, kung talagang nais ng mamamayan na maging malinis ang eleksiyon ay makipagtulungan sila, maging mapagmatyag at isumbong sa Comelec ang mga makikita nilang maling gawi, na may kinalaman sa halalan.

National

50.78% examinees, pasado sa Nov. 2024 Licensure Exam for Agriculturists

“Mga taumbayan, makibantay po kayo. Sabihin nila trabaho ‘yan ng Comelec, bakit nila gawin? Maawa naman po kayo sa ‘min. Kung gusto n’yo talaga ng malinis na halalan, tumulong po ang taumbayan sana,” panawagan pa ni Guanzon sa isang panayam sa radyo.

“Ang hinihingi namin makibantay na lang rin kayo, dahil hindi namin kaya na bantayan lahat ‘yan,” ani Guanzon.

Inihalimbawa pa ni Guanzon ang mga insidente ng vote buying, gaya ng pamimigay ng gadgets, pera at iba pang items ng mga kandidato sa mga botante, na dapat i-report sa mga opisyal ng Comelec sa kanilang lugar, gayundin ang pagkakaroon ng illegal campaign materials.

Nanawagan rin si Guanzon sa mga botante na huwag magpasilaw at huwag ibenta ang kanilang boto kapalit ng kakarampot na halaga.

“Sana matigil na ang vote buying, para naman maayos itong election natin,” sabi ni Guanzon. “Sana ‘yung mga botante ‘wag na lang kayong magbenta ng boto n’yo. Kasi ‘yan mahirap para sa Comelec na bantayan, at ‘yan talaga nakakasira sa election natin.”