Ni MARY ANN SANTIAGO

Nalagutan ng hininga ang isang buntis nang pagsasaksakin ng kanyang kinakasama dahil umano sa matinding selos, at idinamay pa ang pamangkin sa Barangay Barangka Ilaya, sa Mandaluyong City, iniulat kahapon.

Sa ulat, napag-alaman na pinatay sina Ma. Rosula Paunil, 40, at pamangkin nito na si “JSB”, kapwa ng Unit 205 Ridgeway Residences, 70 Dansalan Street, Bgy. Barangka Ilaya noong Abril 16, ngunit kamakalawa lamang nadiskubre ang kani-kanilang bangkay.

Agad ipinag-utos ni Eastern Police District (EPD) Director Police Chief Supt. Reynaldo Biay sa Mandaluyong City Police, na pinamumunuan ni Police Senior Supt. Moises Villaceran, ang pagtugis sa suspek na si Benjamin Pardenez, Jr., taxi driver, ng Dalia St., Bgy. Magdiwang, Bacoor, Cavite.

National

Ofel, mas humina pa habang nasa vicinity ng Gonzaga, Cagayan

Sa ulat na ipinarating kay Biay, isang testigo ang nag-ulat sa pulisya hinggil sa naganap na pagpatay sa magtiyahin, dakong 6:00 ng gabi kamakalawa.

Ayon sa testigo, sa ganap na 11:30 ng gabi noong Lunes, nakatanggap siya ng tawag mula kay Pardenez at sinabing napatay nito ang mga biktima.

Agad namang rumesponde ang mga tauhan ng Follow-Up Unit ng Mandaluyong City Police, sa pangunguna ni SPO3 Renante Guillergan, sa lugar at napansin na nakakandado ang pinto ng bahay.

Sa tulong ng ilang concerned citizen, sinira ng mga pulis ang kandado at pinasok ang bahay hanggang sa natagpuan ang bangkay ng mga biktima na kapwa tadtad ng saksak sa katawan.

“Nakonsensiya ang informant na pinatay ng kaibigan niya ‘yung magtiya kaya sinabi sa atin,” ani Villaceran.

Crime of passion ang isa sa mga tinitingnang anggulo sa krimen.

Ayon kay Villaceran, sinabi ng impormante na nagselos ang suspek kaya nagawa ang pagpatay.

“Selos ‘yung sinabi ng informant,” ani Villaceran.