Ni NORA CALDERON
CHILDHOOD dream ni Marian Rivera na maging teacher at bagamat BS Psychology ang kinuha niya sa college, bago siya nakapasok sa show business ay nagturo muna siya sa isang private grade school.
Likas siyang mahilig sa mga bata, kaya ngayong nanay na siya, natuwa siya na gaganap siya bilang teacher sa bagong project na ibinigay sa kanya ng GMA Network. Pero hindi siya basta teacher dahil may pagka-fantasy at action ang series na gagawin niya, ang Super Ma’am.
ALAMIN: Ano nga ba ang EBET Law na pinirmahan ni PBBM
“Na-excite ako talaga nang malaman kong ganoon ang concept ng series namin,” sabi ni Marian. “Kuwento kasi ito ng isang guro na ayaw mag-give-up sa pagtuturo dahil love at passion niya talaga ang pagiging teacher. May mangyayari sa kanyang isang malaking pagbabago na magli-lead sa kanya para tumulong sa kapwa niya. Kaya para sa akin, dream come true ito kahit palabas lang ito sa TV.
“Masaya rin ako na maging superhero muli tulad ng ginawa ko noon, kaya dedicated ko ito sa mga fans na matagal nang naghintay na mapanood akong muli. Marami kasi sa kanila ang nagri-request na maging superhero muli ako. Kaya naman pumayag na ang production na ipakita ang costume at weapon na gagamitin ko bilang isang superhero.”
Based sa character sketch ng role ni Marian, siya ay si Minerva Henerala, high school teacher na dahil may pagka-weird ay madalas asarin at pagtripan ng mga estudyante niya. Pero nang minsang nagkaroon siya ng encounter sa mga Tamawo, nagbago ang buhay niya at nagta-transform siya into a female fatale superheroine at tinawag siyang si Super Ma’am na may fantastic adventure laban sa masasamang tao.
Idinidirek ito ni LA Madridejos makakasama ni Marian sina Ms. Helen Gamboa, Al Tantay, Jackielou Blanco, Jerald Napoles, Kim Domingo, Joyce Ching, Kristoffer Martin, at Andrew Gan. May bago siyang leading man, si Matthias Rhoads at may special participation sa serye sina Ms. Dina Bonnevie at Ms. Carmina Villarroel. May special guest role din si Ms. Ai Ai delas Alas na kuwento ni Marian ay nagalit daw sa kanya nang isabak niya sa isang action scene. Sa september 18 na ang premiere airing ng Super Ma’am.
