Ni: Czarina Nicole O. Ong
Pinayagan kahapon ng Sandiganbayan Seventh Division si dating First Gentleman Mike Arroyo na magbiyahe patungong Taipei, Taiwan sa Agosto 25-28, 2017 at sa ilang bansa sa Europa sa Setyembre 10 hanggang Oktubre 6, 2017.
Sa kanyang mosyon, hindi tinukoy ni Arroyo kung may kinalaman sa negosyo o personal ang nasabing mga biyahe.
Gayunman, sinabi niyang plano niyang magtungo sa Frankfurt, Germany sa Setyembre 11-20, na susundan ng pagbiyahe niya sa Munich sa Setyembre 20-25.
Ice Seguerra, natsikang buntis
Pagkatapos, magtutungo naman siya sa Paris, France sa Setyembre 25-30, at sa Madrid, Spain sa Setyembre 30 hanggang Oktubre 5. Sa Oktubre 6 na ang balik niya sa Pilipinas.
Nahaharap ang asawa ni dating Pangulong Gloria Arroyo sa mga kasong graft kaugnay ng umano’y maanomalyang pagbili ng overpriced helicopters ng pulisya, at sa pagkakadawit sa $329-million national broadband deal sa ZTE Corporation.
