Magkakayakap pa nang matagpuang ng mga awtoridad ang bangkay ng tatlong mag-iina na nasawi nang ma-trap sa loob ng tinutuluyan nilang bahay sa Taytay, Rizal, kamakalawa ng gabi.
Kinilala ang mga biktima na sina Maria Theresa Augustine Hermocilla, 23; dalawa niyang anak na sina Terrence, 5; at Andrea, 4, pawang residente ng St. Anthony Subdivision, sa Barangay San Isidro, sa Taytay.
Ayon kay SFO3 Mario Paredes, ng Bureau of Fire Protection (BFP) sa Rizal, dakong 7:35 ng gabi nangyari ang sunog sa nasabing bahay kung saan nagsisilbing caretaker ang mga biktima.
Base sa imbestigasyon, nasa loob ng kuwarto ang mag-iina nang sumiklab ang apoy na nagmula umano sa sinindihang kandila na ipinatong sa isang plastic na lamesa sa sala. (Mary Ann Santiago)
