ISULAN, Sultan Kudarat – Pawang nasakote ang mga tatlong puntirya sa magkakahiwalay na buy-bust operation ng Sultan Kudarat Police Provincial Office (PPO) nitong Martes.
Ayon kay Sultan Kudarat PPO Director Senior Supt. Raul Supiter, dakong 4:30 ng hapon nang ikasa ang unang operasyon sa Purok Daisy, Barangay New Isabela, Tacurong City at nahulihan si Jed Betito ng apat na sachet ng hinihinalang shabu.
Dakong 5:00 ng hapon nang maaresto sa Isulan si Richelle Morales y Dasmariñas, 45, may asawa, walang trabaho, ng Bgy. Poblasyon, Tacurong, at makumpiskahan ng dalawang sachet ng hinihinalang shabu at marked money.
Bandang 9:30 ng gabi nang matimbog si Isidro Emplamado y Capundan, 50, may asawa, tricycle driver, ng Bgy. Bambad, Isulan, at makuhanan ng 14 na sachet ng hinihinalang shabu at marked money. (Leo P. Diaz)
