Inaasahang ipakikilala ng Letran Knights ngayon ang napiling bagong coach para sa kanilang kampanya sa NCAA men’s basketball tournament.
Isasagawa ang media conference ngayong tanghali. Sa kabila ng walang impormasyon na ibinigay ang imbitasyon ng eskwelahan sa media, matagal nang bulung-bulungan si National University junior basketball coach Jeff Napa ang bagong hahawak sa Knights.
Matagumpay na napangasiwaan ni Napa ang Bullpups sa katatapos na UAAP junior finals laban sa La Salle-Zobel. Ito ang ikatlong titulo ng NU, sa pangangasiwa ni Napa, sa nakalipas na limang season.
ALAMIN: Mga dapat mong malaman tungkol kay Jose Rizal
Nauna namang inamin ni Napa na nakikipag-usap siya sa Letran management matapos ialok ang posisyon.
Dating miyembro ng NU Bulldogs si Napa at inaasahang tugma ang kanyang istilo sa Knights na iniwan ni Aldin Ayo matapos tanggapin ang alok na maging coach ng La Salle sa UAAP.
Sasabak ang Knights sa pagbubukas ng Season 91 na wala ang top players na sina Mark Cruz at Kevin Racal.
Samantala, ayon sa isang opisyal na may direktang kinalaman sa usapin ngunit tumangging pangalanan, ibinigay kay NU assistant coach Chico Manabat ang basketball program ng Bullpups.
