NAGULAT at nabulabog ang entertainment press nang tawagin si Jonalyn Viray sa simula ng grand press launch ng seryeng We Will Survive sa Restaurant 9501 kahapong tanghali.
Kinanta ni Jonalyn ang I Will Survive ni Gloria Gaynor na magiging theme song ng bagong primetime teleserye ng Dos na pinagbibidahan nina Pokwang, Melai Cantiveros kasama sina Regine Angeles at Bea Saw, atbp.
Matagal nang tapos ang kontrata ni Jonalyn sa GMA Network kaya tiyak na walang naging problema sa pag-oober da bakod niya sa Kapamilya Network.
Tiyak din na maraming mga tagahanga niya ang matutuwa sa bagong development na ito sa kanyang career.
'Iconic women!' Pinakamalaki at pinakamaliit na babae sa buong mundo, nagkita!
Isa sa pinakamahuhusay pero underrated na singer/performers si Jonalyn. Ilang beses na namin siyang napanood nang live at kahit bulinggit, makapigil-hininga ang pagkanta niya. Walang eksaherasyon, kayang-kaya niyang lamunin nang buung-buo sa pagalingan sa pagkanta ang overrated na singer/performers sa kahusayan niya.
Huli namin siyang napanood last Christmas sa special show ni Dessa, isa pang maligno ang boses, nang mag-birthday ang kanilang publicist na si Chuck Gomez sa Historia Bar.
Kahapon, inihayag din sa presscon na may bago na siyang pangalan: Jona.
Kaabang-abang ang pagsali ni Jona sa ASAP. Hihintayin natin ang showdown niya kina Sarah Geronimo, Angeline Quinto, Jed Madela at napakarami pang iba. (DINDO BALARES)
