Duguan at wala nang buhay nang matagpuan sa loob ng tricycle ng kanyang mga kasamahan ang isang lalaki, makaraan siyang pagbabarilin ng hindi pa nakikilalang salarin na naging pasahero niya sa Caloocan City, nitong Huwebes ng gabi.
Kinilala ang biktima na si Danilo Amparado, 53, tricycle driver, ng 1894 Kamagong Street, Bagbaguin, Barangay 165 ng nasabing lungsod.
Nagtamo ito ng dalawang tama ng bala ng .45 caliber pistol sa ulo.
Ayon kay PO3 Gomer Mappala, dakong 10:00 ng gabi nang sumakay sa minamanehong tricycle ni Amparado ang suspek sa Ciudad Grande, Bagbaguin sa Bgy. 165, Caloocan City.
50.78% examinees, pasado sa Nov. 2024 Licensure Exam for Agriculturists
Pagbaba ng salarin, binaril nito sa ulo ang biktima saka mabilis na tumakas.
“Base sa pahayag ng ilang saksi parang nagtalo daw sa pasahe ‘yung victim at suspek hanggang sa humantong sa barilan,” ani Mappala.
Nagsasagawa na ng follow-up operation ang mga pulis para sa pagkakakilanlan ng salarin. (Orly L. Barcala)
