SA pakikipagtulungan sa QCPD-DSOU, muling nakalambat ang Games and Amusement Board (GAB) ng ilegal na operasyon sa karera at sabong sa Quezon City.
Ang operasyon, na nagresulta sa pagkaaresto ng tatlong suspect, ay bunsod ng inisyatibo ng GAB na supilin ang operasyon ng illegal bookies sa karera ng kabayo dahil ang mga ito ay walang permit mula sa GAB samantalang meron namang mga Off-Track Betting Stations (OTBS) na may kaukulang permit o legal na nag-ooperate.
Ang mga nadakip ay sumailalim sa proseso para sa pag-file ng Inquest gaya ng fingerprinting, medikal at pagkukuha ng larawan at kasalukuyang nasa kustodiya ng QCPD-DSOU. Ang mga kagamitan at materyales na nasakote mula sa operasyon ay naimbentaryo saksi ang mga opisyal ng barangay at nasa pangangalaga din ng QCPD-DSOU bilang ebidensya.
