Tinambangan ng hindi kilalang suspek ang isang mag-live in partner na nagresulta sa pagkamatay ng mister at pagkasugat naman ng kanyang kinakasama sa Malate, Maynila, nitong Lunes ng gabi.

Nasawi habang ginagamot sa Ospital ng Maynila si Rico Delos Reyes, 48, ng 1129 Champaca Street, Malate, Manila dahil sa tinamong tatlong tama ng bala sa katawan habang ginagamot pa rin sa nabanggit na pagamutan ang kinakasama niyang si Madel Reateza, 26, dahil sa tama ng bala sa paa, binti at balikat.

Sinabi ni SPO3 Charles Duran, ng Manila Police District (MPD)-Homicide Section, na pasado 11:02 ng gabi nang mangyari ang insidente sa harap ng bahay ng mga biktima.

Nanonood ng telebisyon si Delos Reyes, kasama ang kanilang mga anak, nang mapansin niya ang suspek na nakatayo sa harap ng kanilang bahay.

Matapos maligwak ang request: Paolo Duterte, pumayag manatili si VP Sara sa kaniyang opisina

Lumabas ng bahay ang biktima para tanungin kung ano ang kailangan ng suspek, ngunit sa halip na sumagot ay bumunot ito ng baril at pinagbabaril si Reyes.

Kaagad namang lumabas ng bahay si Reateza upang tingnan ang nangyari ngunit maging siya ay pinaputukan din ng suspek bago ito tumakas.