Nakabawi mula sa kanyang pangangapa sa kanyang opensa si Aljun Melecio ngunit nakuha pa rin ng De La Salle-Zobel ang kanilang ikalawang sunod na panalo matapos pataubin ang UP Integrated School, 72-61, kahapon sa pagpapatuloy ng UAAP Season 78 juniors basketball tournament sa San Juan Arena.
Pinadapa naman ng dating kampeong National University (NU) ang University of Santo Tomas (UST), 80-54, upang pumantay sa DLSZ sa liderato sa barahang 2-0, panalo-talo, sa pangunguna ni Winderlich Coyoca, Karl Penano at John Lloyd Clemente na nagtala ng pinagsamang 44-puntos.
Nakabawi naman sa kanilang naunang kabiguan sa kamay ng La Salle ang defending champion Ateneo sa pamumuno ni Jolo Go na nagtala ng 34- puntos para kanilang magapi ang Far Eastern University (FEU), 85-66, habang umangat din gaya nila sa patas na barahang 1-1, panalo-talo, ang Adamson kasunod ng Adamson University, 83-52, paglampaso sa University of the East (UE).
Kasunod ng kanyang 46 na puntos kontra Blue Eaglets, umiskor lamang ng 26-puntos si Melecio sa kanilang ikalawang laro ngunit nakapag-ambag naman ito sa iba pang departamento matapos magposte ng 7 assist, 6 na rebound at 5 steal.
'Pikon daw?' UAAP fan na nag-dirty finger, agaw-eksena sa San Juan Arena!
Nakatulong naman ni Go para sa Ateneo sina Bryan Andrade at Romulo Berjay na nagtala ng 13 at 10 puntos, ayon sa pagkakasunod.
Umiskor naman ng 17-puntos at 8 rebound si Kenji Roman habang nagdagdag sina James Bieren at JJ Sapinit ng tig-13 puntos para sa Baby Tamaraws, na ngayo’y nasa 4-way tie sa ikalawang posisyon katabla ng Tiger Cubs, Eaglets at Baby Falcons. (MARIVIC AWITAN)
