CANDON CITY, Ilocos Sur – Magsasagawa ang Department of Labor and Employment (DoLE) ng mega job fair na mag-aalok ng 3,000 local at overseas na trabaho sa Oktubre 3, 2014 sa Manna Mall sa San Fernando City, La Union.

Sinabi ni DoLE Region 1 Director Grace Ursua na katuwang ng kagawaran ang La Union Provincial Employment Service Office (PESO) at Manna Mall sa pagkakaloob ng trabaho na iaalok ng 24 na local employer at pitong licensed recruitment agency (LRA).

Kabilang sa mga lokal na trabahong iaalok ang accountant, auditor, human resource manager, pharmacist, corporate communications specialist, IT developer/ programmer, engineer, supervisor, customer service representative, technical support consultant at iba pa.

Nangangailangan naman sa ibang bansa ng mga engineer, foreman, assistant technician, electrical supervisor, karpintero, tubero, marble fixer, metal fabricator, heavy equipment operator, helper, welder, cook, driver at iba pa. - Freddie G. Lazaro