NAGBIGAY ng kahandaan ang Team Medrano na binubuo nina Genghis Katipunan Imperial, Gamaliel Delo Santos at Alexander Reyes sa pagtulak ng 2nd Caine Knights Tatlohan Chess Team Tournament 2000 limit rating sa Hulyo 7 sa League One Southgate Mall (dating Alphaland Southgate Mall), malapit sa MRT Magallanes Station, Edsa, Makati City.
Kabuuang P27,000 ang masusubi ng koponan na magkakampeon habang maiuuwi naman ng second placer ang P15,000, habang nakalaan sa third hanggang seventh placers ang tig P10,000, P6,000, P4,000, P3,000 at P2,500, ayon sa pagkakasunod.
Ipapatupad sa National Chess Federation of the Philippines sanctioned rapid tournament ang seven round Swiss System format, 20 minutes match point system na may 5 seconds delay para tapusin ng manlalaro ang kanilang laro.
Magsisilbing tinik din sa kampanya ng Team Medrano ang koponan ng Andel with Care nina Jayson Visca, Andrade Tayson at Leo Aldrin Caraig maging ang Strawhat Team na seselyuhan naman nina Erickson Marimla, Joselle Moreno at Jacob Sta. Ana.
