LA PAZ, Tarlac – Sugatan ang driver ng isang pick-up truck gayundin ang tatlong pasahero niya makaraang makagitgitan ang isa pang pick-up habang bumibiyahe sa La Paz-Zaragosa Road sa Barangay San Roque, La Paz, Tarlac, nitong Sabado ng umaga.
Kinilala ni SPO1 Guilliver Guevarra ang mga biktimang sina Ronnel Ermita De Guzman, driver ng Nissan Navarra; Rommel Ermita, 46; Emily Ermita, 46; at Roniel Ermita De Guzman, 12, pawang taga-Bgy. Aglipay, Rizal, Nueva Ecija.
Tumakas naman ang driver ng Mitsubishi pick-up truck na nakagitgitan ng mga biktima.
Dakong 7:10 ng umaga nitong Sabado, patungong kanluran ang Navarra nang biglang nag-overtake ang Mitsubishi pick-up at aksidenteng nasagi sa gilid ang Navarra hanggang nawalan ng kontrol at bumalandra sa kalsada. (Leandro Alborote)
