Matinding hamon ang inaasahang haharapin nina Sarah Barredo at Mark Alcala sa kanilang pagtatangka na maidepensa ang kani-kanilang titulo sa pagpalo ng FDG Cup Badminton Championships sa Hunyo 9, sa Power Smash Badminton Center sa Makati City.
Nagapi ng 19-anyos na si Barredo si Gelita Castilo para makamit ang women’s Open singles crown sa nakalipas na taon, ngunit inaasahang mas matindi ang susuungin niyang laban kontra sa hanay ng mga beteranong karibal na kinabibilangan nina PBA Smash Pilipinas mainstays at No. 2 Airah Albo, third seed Mariya Sevilla, at No. 4 Monica Rivera ng La Salle/ABR.
Sasabak din ang dating RP No.1 na si Malvinne Alcala, gayundin ang dating national champion na si Bianca Carlos sa taunang torneo na idinaraos bilang pagpupugay kay Robinsons Land Corp. president Frederick D. Go at sanctioned ng Philippine Badminton Association.
Asong inabandona sa paradahan ng tricycle noon, 'poging-pogi' na ngayon
Dikdikan din ang inaasahang labanan sa men’ s singles Open Category kung saan haharapin ni Alcala ang 64- player field na kinabibilangan ng kapwa national player na sina second seed Kevin Cudiamat, No. 3 Ros Pedrosa, fourth ranked Kenneth Monterubio, No. 5 Ryan Ormilla at sixth seed Frell Gabuelo.
Magiging dagdag atraksiyon ang paglahok ng mga Indonesian rated player na sina Dea Rangga, Viky Anindita, Ivano Hutabarat at Christofle Brians, at Malaysian Arif Lati.
Tampok din sa men’s premier competition ang mga top players mula UP, Ateneo, La Salle, Adamson, Team Prima, Tanauan Badminton House, Robinsons Land, Makisig Badminton Academy, Allied/JLTC, Ilocos Sur BC, National U, St. Benilde, Serrano Twins Training Camp, Far Eastern U, iShuttlers, Lyceum, United Metro BC, at Escoses Training Camp.
(Marivic Awitan)
