SA huling survey ng Social Weather Station para sa 3rd quarter ng taon ay lumalabas na ang kagutumang dinaranas sa ‘Pinas ay umabot na sa 3.5 milyong pamilya. Napag-alaman din sa naturang survey na isinagawa noong Setyembre 2 hanggang 3 na 15.7 porsiyento sa mga na-survey ay nagsasabing nakaranas sila ng gutom sa nagdaang tatlong buwan.
Aba, kakaunti! Ang akala kasi ng marami ay wala nang nabubusog sa ‘Pinas kundi ang mga mapagsamantalang opisyales ng gobyerno at negosyante. Dahil nagkalat sa mga kalye ang mga bata at matatanda na naghahalungkat ng basurahan para may makain.
Maging sa mga public school ay bihira kang makakakita ng hindi malnourished. Pati mga magulang ay buto’t-balat na tanda ng kagutuman. Tatlong milyon at kalahating pamilya ang kulang sa tsibug. Marami ang hindi naniniwalang tumaas na ang antas ng ating ekonomiya. Dahil ang alam nilang tumataas ay ang binabayaran nilang utang sa bumbay.
Mahilig ka ba sa sardinas? Isa ito sa pambansang pagkain ngayon ng mga maralita pero may masamang balita tungkol dito. Dadalang na raw ang galunggong at tamban sa pamailihan kaya malamang na umakyat na rin ang presyo ng sardinas.
Ayon kay Department of Agriculture Secretary Proceso Alkala, inaprubahan na ang implementasyon ng “no harvest season” para sa mga nasabing isda. Kaya sa halip na sardinas, bumili na lamang kayo ng corned-beef, kung may pambili kayo.
Mahilig din ba kayo magbasa ng mga kuwentong hindi kapani-paniwala? Sa Ingles, ang tawag dito ay “Believe it or Not” pero sa Tagalog, ito ay “Bilibid or Not?”
Ito ay tungkol sa isang Korean fugitive na nagngangalang Cho Seongdae, 49. Wanted si Cho sa kasong extortion sa South Korea. Una siyang nadakip noong Setyembre 11 ngunit nagdahilang nahihirapan sa paghinga at nang dalhin sa ospital ay nakatakas.
Nadakip siya noong Setyembre 29 at dinala sa BI detention center pero muling nakatakas. Noong Oktubre 12 ay muling nahuli ang loko pero naisahan nanaman ang mga tagabantay sa pamamgitan ng panunuhol sa mga jail guard.
Lumabas din ang magic ng tarantadong Koreano. Pera pala ang ginagamit nito sa pagtakas.
Kung sa Davao City ito nangyari, hindi makakatakas ang Koreano. Kapag nahuli, ikukulong siya agad ni Mayor Rodrigo “Digong” Duterte sa loob ng ataul kaya hindi na siya makakatakas.
Sa Metro Manila, sa umaga ay kulong at makakalaya sa hapon basta may milyon! (ROD SALANDANAN)
