Tahasang ipinahayag ni Palace Press Officer at Presidential Communications Office (PCO) Undersecretary Atty. Claire Castro na hindi kailangan ni Pangulong Ferdinand “Bongbong” Marcos, Jr. na antabayanan o bantayan ang paggulong ng impeachment trial ni Vice President Sara Duterte sa Senado.
Sa isinagawang press briefing ng PCO nitong Lunes, Hulyo 6, iginiit ni Usec. Castro na marami umanong tatrabahuhin ang Pangulo kaysa panoorin ang paglilitis sa Pangalawang Pangulo.
“Hindi naman po kinakailangang mag-monitor ang Pangulo, malalaman naman po din niya kung ano ang magiging balita rito,” saad ni Usec. Castro.
Aniya, “Mas marami pong dapat na trabahuhin ang ating Pangulo at hindi po siya uupo lamang para po manood ng impeachment trial.”
Ibinahagi rin ng press officer ang “thoughts” ni PBBM hinggil sa pagharap ngayon ni VP Sara sa impeachment trial—na dati nitong kaalyado at runningmate noong 2022 national elections.
“Katulad po ng sinabi po natin even before, at nagsalita na rin po ang Pangulo sa Kapihan, kung may kinakailangan pong sagutin, ay dapat lamang pong sagutin,” anang press officer.
“Kung kaya niya naman po na malinis ang mga pangalan ay dapat lamang pong gawin—mas maganda pong humarap sa nasabing trial para po siya na mismo ang sumagot ng mga akusasyon laban sa kaniya,” pagtatapos ni Usec. Castro.
Matatandaang iginiit ni PBBM na mas magiging madali at malinaw umano ang proseso kung personal na dadaluhan ni VP Sara ang impeachment trial.
“It’s not for me to say one way or the other. But of course, it would be much easier to get to the bottom of everything if you can speak to the accused directly—and the accused can answer directly—not through secondary channels, not through the lawyers,” saad ni PBBM sa Kapihan with the Media sa Vancouver, Canada noong Linggo, Hulyo 5 (oras sa Pilipinas).
MAKI-BALITA: PBBM, sinabing mas dadali proseso kung dadalo VP Sara sa impeachment trial-Balita
Giit pa ng Pangulo, dadaluhan niya raw ang paglilitis kung siya man ang akusado.
MAKI-BALITA: Kung siya raw ang accused: PBBM, personal na dadalo sa impeachment trial!-Balita
Buwelta naman ni VP Sara, walang halaga ang mga opinyong ibinahagi ni PBBM.
MAKI-BALITA: Opinyon ni PBBM sa impeachment trial, walang halaga—VP Sara-Balita
