Patuloy na uulanin ang malaking bahagi ng bansa ngayong Lunes, Pebrero 13, bunsod ng low pressure area (LPA) at northeast monsoon o amihan, ayon sa Philippine Atmospheric, Geophysical and Astronomical Services Administration (PAGASA).
Sa tala ng PAGASA kaninang 4:00 ng madaling araw, magkakaroon ng kaulapan na may kalat-kalat na pag-ulan at thunderstorms scattered sa Mindanao, Eastern Visayas, at Bohol dahil sa LPA. Maaaring makaranas ng pagbaha o kaya naman ay pagguho ng lupa rito dahil sa katamtaman hanggang sa malakas na pag-ulan.
Magiging medyo maulap hanggang sa maulap na may kasamang katamtamang pag-ulan sa Metro Manila at mga natitirang bahagi ng Luzon dulot ng amihan. Wala namang inaasahang malaking epekto ang pag-ulan dito.
Samantala, makarararanas ng medyo maulap hanggang sa maulap na may panaka-nakang pag-ulan o thunderstorms sa Palawan at mga natitirang bahagi ng Visayas dahil sa localized thunderstorms.
PUP nagbukas na rin ng klase para sa female PDLs ng Manila City Jail
Pinag-iingat din ng PAGASA ang mga residente sa mga nasabing lugar dahil sa posibleng pagbaha o kaya naman ay pagguho ng lupa tuwing magkakaroon ng malakas na thunderstorms.
