INAASAHANG mapakikinabangan ng mga power consumer sa Pangasinan at Cebu ang tatlong waste-to-energy facility na nagkakahalaga ng $230 million at inaasahang bubuksan pagsapit ng 2022.

Sa isang panayam sa Waste-to-Energy Summit na idinaos sa Quezon City nitong Biyernes, sinabi ni Integrated Green Technology (IGT) president and chief executive officer, Michael Jimenez, na magsisimula ang konstruksiyon ng mga planta sa unang bahagi ng 2020 at inaasahang matatapos sa loob ng dalawang taon, depende sa mga contractors at sa panahon.

Ayon kay Jimenez “sustainable” ang pasilidad lalo’t ang teknolohiya nito ay ipagkakaloob ng Paris-based CNIM Martin Private Ltd., na kilala sa magandang rekord ng pagtatayo sa mahigit 170 waste-to-energy facilities sa 23 bansa.

Para sa Cebu, inaasahang aabot sa 480 tonelada kada araw ang makokolekta ng planta, kung saan inaasahang makalilikha ang 50 tonelada ng 1 megawatt.

Gayunman, binigyang-diin niya na ang kapasidad ng malilikha ng pasilidad ay hindi lahat maibibigay sa power grid.

“For Cebu, at 480 (tons), we can generate about 12 megawatts but the volume we can sell to the grid is only about 8 to 9 megawatts, because we’re going to use it for our own plants,”aniya.

Higit pang pinaigting ng Pilipinas ang implementasyon ng Republic Act 9003, o ang solid waste management program, ngunit may ilang mga lugar pa rin ang nahaharap sa problema ng waste segregation.

Ani Jimenez, hindi naman ito isyu dahil pinaghahalo pa rin nila ang mga basura sa pagpoproseso.

“We’ll follow the law but we do our own thing for how we are going to process it,”paliwanag niya.

Nang matanong hinggil sa posibleng makikipag-ugnayan sa mga lokal na pamahalaan sa National Capital Region (NCR), sinabi ni Jimenez na hinihintay na lamang nila ang magiging feedback bago ito ipresenta sa mga lokal na pamahalaan ng Quezon City, Pasig City, at Manila.

Saad ni Jimenes, kailangan ng NCR ng hanggang tatlong waste-to-energy facilities upang masuportahan ang panuntunan.