SAN JOSE CITY, Nueva Ecija – Patay ang isang 22-anyos na lalaki makaraang araruhin ng isang van ang sinasakyan niyang Isuzu dump truck habang nakaparada sa Maharlika Highway sa Barangay Tayabo sa lungsod na ito, kahapon ng madaling-araw.
Kinilala ng San Jose City Police ang nasawi na si Bizmark Paeste y Espiritu, ng Bone North, Nueva Vizcaya, na namatay habang ginagamot sa San Jose City Hospital.
Ayon kay Alfredo Quintero y Fernandez, 45, driver ng dump truck, ng Bgy. Dagupan, Quezon, Nueva Vizcaya, dakong 2:00 ng umaga nang aksidenteng suruin ng Isuzu Chitler van (MMV-972) na minamaneho ni Leo Caun y Bernal, 32, ng Aritao, Nueva Vizcaya, ang nakahimpil nilang truck.
Kasong reckless imprudence resulting to homicide at damage to property ang kinakaharap ni Caun. (Light A. Nolasco)
