FINAL poster na kaya ng Star Cinema MMFF entry na All You Need is Pag-ibig ang nakita naming naka-post sa Instagram (IG) account ni Kim Chiu? Halos lahat ng cast may picture sa poster, maliban kay Derek Ramsay na leading man pa naman ni Kris Aquino.
Ang tanong tuloy ng fans ng aktor ay kung kasama ba talaga sa pelikula si Derek. At kung kasama, bakit wala ang picture nito sa poster ng movie? Siguro naman masasagot ni Direk Antoinette Jadaone o mga bossing ng Star Cinema ang tungkol dito. Puwede ring si Derek mismo ang sumagot sa tanong.
Maganda ang tag line ng movie na “Sa buhay ng bawat tao #AllYouNeedIsPagibig” at makikita sa poster na magkayakap sina Ronaldo Valdez at Nova Villa, Ian Veneracion at Jodi Sta. Maria at Xian Lim at Kim Chiu. Magkasama rin sa poster ang dalawang apo ni Charo Santos-Concio at solo ang picture nina Pokwang, Bimby at Kris Aquino.
