Nasa'n ang Bato? Manhunt kay Sen. Dela Rosa, patuloy giit ni NBI Dir. Matibag!-Balita

Nasa'n ang Bato? Manhunt kay Sen. Dela Rosa, patuloy giit ni NBI Dir. Matibag!

Nilinaw ni National Bureau of Investigation (NBI) Director Atty. Melvin Matibag na hindi pa naaaresto si Sen. Ronald "Bato" Dela Rosa, taliwas sa mga kumalat na ulat sa social media nitong Martes, Agosto 4.

Ayon sa ambush interview ng media kay Matibag, hindi raw ang kanilang grupo ang nagkasa ng pag-aresto laban sa senador, at tila wala raw siyang alam tungkol dito.

"Hindi. Sa amin, wala. I don’t know kung sino. Wala sa amin,” nang tanungin kung sila ba ang dumakip sa senador.

Giit pa niya, araw-araw nagpapatuloy ang operasyon upang hanapin ang senador, na nahaharap sa warrant of arrest mula sa International Criminal Court (ICC) kaugnay ng umano'y crimes against humanity na may kaugnayan sa kampanya kontra ilegal na droga noong administrasyon ni dating Pangulong Rodrigo Duterte.

Nauna nang sinabi ni Department of Justice (DOJ) spokesperson Atty. Polo Martinez na wala pa silang detalye hinggil sa umano'y pag-aresto kay Dela Rosa.

Sinabi rin ni Department of the Interior and Local Government (DILG) Secretary Jonvic Remulla na wala siyang natatanggap na impormasyon na nagpapatunay sa naturang balita.

Samantala, sinabi ni Sen. Panfilo "Ping" Lacson na "negative" ang impormasyong natanggap niya mula sa kaniyang mga contact sa NBI, at wala rin umano siyang nakukuhang kumpirmasyon mula sa Philippine National Police (PNP) at Armed Forces of the Philippines (AFP).

Ayon pa kay Lacson, kung totoong nahuli na ang senador, malamang ay naihatid na siya sa airport para dalhin sa The Hague, Netherlands kung saan naroon ang ICC at nakadetine si FPRRD.

"Kung nahuli 'yun, nasa airport na 'yun," ani Lacson.

Maki-Balita: Sen. Ping sa umano'y pagdakip kay Sen. Bato: 'Kung nahuli yun, nasa airport na yun!'

Nagdulot din ng espekulasyon ang Facebook post ni Atty. Jimmy Bondoc, na nagsabing, "Bad news is coming. Pray hard that it is not true, for the good of the nation." Gayunman, wala siyang tahasang binanggit na may kaugnayan ito kay Dela Rosa.

Maki-Balita: 'Bad news is coming. Pray hard that it is not true, for the good of the nation!'—Jimmy Bondoc

Sa ngayon, nananatiling wala pang opisyal na kumpirmasyon na naaaresto na si Sen. Dela Rosa, habang kinumpirma ng NBI na patuloy pa rin ang manhunt operation laban sa senador alinsunod sa umiiral na warrant of arrest ng ICC.

Sen. Ping sa umano'y pagdakip kay Sen. Bato: 'Kung nahuli yun, nasa airport na yun!'

Natanong si Sen. Panfilo 'Ping' Lacson kung may natanggap na siyang impormasyon kaugnay sa kumakalat na balitang umano'y naaresto na si Sen. Ronald 'Bato' Dela Rosa. Ang pahayag ni Lacson ay kasunod ng pagkalat ng iba't ibang ulat sa social media hinggil sa sinasabing pagkakadakip ng senador, na hanggang ngayon ay hindi pa kinukumpirma ng mga awtoridad. Ayon kay...

SPD, kinumpirma pamamaril sa Makati; mag-ina, biktima!

Kinumpirma ng Southern Police District (SPD) na nagkaroon ng malagim na insidente ng pamamaril sa Makati City noong Lunes, Agosto 3 na bumiktima sa isang mag-ina. Batay sa pahayag ng SPD nitong Martes, Agosto 4, bandang 6:46 ng Agosto 3 nang maganap ang pamamaril sa kahabaan ng Makati Avenue cor. Durban St., Brgy. Poblacion. Ang trahedya ay nagdulot ng pagkasugat ng anak na 26-anyos at...

Sen. Risa, isinusulong imbestigasyon ng Senado sa Pax Silica!

Isinusulong ni Sen. Risa Hontiveros ang isang Senate inquiry upang masusing suriin ang posibleng economic at socioeconomic impact ng Pax Silica, ang planong industrial hub na itatayo sa New Clark City, Tarlac. Sa ilalim ng Proposed Senate Resolution No. 563, hiniling ni Hontiveros sa naganap na sesyon sa Senado nitong Martes, Agosto 4, ang pagsasagawa ng imbestigasyon upang matiyak kung ang...