Nahingan ng reaksiyon at komento si House lead prosecutor at Batangas 2nd District Rep. Gerville Luistro sa naging puna ni Senator-Judge Robin Padilla, na dapat daw hindi "one-sided" ang prosecution, sa naganap na ikasiyam na araw ng impeachment trial kay Vice President Sara Duterte.
"With all due respect kay Senator-Judge Robin Padilla, apparently this impeachment trial is adversarial," ani Luistro sa isinagawang press conference ng prosecution panel matapos ang trial.
"Maliwanag yun. Kaya merong prosecution is to establish the case. Kaya may defense, is to defend the innocence of the respondent. So it is very much anticipated that the prosecution is biased towards presenting the case, presenting the evidence. Siguro mas nakakapagtaka 'pag naging neutral ang prosecution. At lalong nakakapagtaka kung ide-defend namin yung respondent," aniya.
Giit pa ni Luistro, dapat daw ang senator-judge ang maging neutral pagdating sa impeachment trial.
Sa naganap na pagdinig, kinuwestyon ni Padilla ang kredibilidad ng affidavit ng self-confessed Davao Death Squad (DDS) member na si Arturo Lascañas sa pagpapatuloy ng impeachment trial nitong Miyerkules.
Sen. Robin Padilla, nilinaw 'one-sided' remarks niya sa prosekusyon
Sa pagdinig, iginiit ni Padilla na hindi dapat pagkatiwalaan ang isang testigong naglalabas ng magkakaibang salaysay. Dahil dito, sinabi ni presiding officer at Senator-Judge Chiz Escudero na posibleng nagsinungaling ang testigo sa isa sa kaniyang mga pahayag at nagsabi ng totoo sa iba, kaya mahirap matiyak kung alin ang mapaniniwalaan.
Nanawagan din si Padilla sa House prosecution panel na iwasang iharap ang mga testigong may alegasyon ng perjury. Partikular niyang binanggit ang dalawang agents ng National Bureau of Investigation (NBI) na sina Atty. Jeremy Lotoc at John Mark Calilung na nauna nang umupo bilang testigo, subalit iginiit ni Luistro na kanilang natiyak na walang nakabinbing kaso laban sa mga testigong iniharap ng prosekusyon.
Nilinaw rin ni Luistro na nabanggit lamang ang International Criminal Court (ICC) kaugnay ng affidavit ni Lascañas, na muling lumutang sa pagtestigo ni NBI Director Melvin Matibag bilang bahagi ng imbestigasyon sa umano'y pagbabanta ni Vice President Duterte laban sa ilang matataas na opisyal ng pamahalaan.
Dito ay sinabi ni Padilla na tila "one-sided" ang prosecution.
"Sana hindi one-sided ang ating prosecution," aniya.
Maki-Balita: Banat ni Senator-Judge Robin: 'Sana hindi one-sided ang ating prosekusyon!'
Dahil dito, matapos ang trial, nahingan ng reaksiyon ang private prosecutor na si Atty. Lorna Kapunan tungkol sa naging pahayag ni Padilla.
Paliwanag pa niya, ang prosecution at defense team ay parehong one-sided dahil kailangan nilang ipagtanggol ang kanilang panig.
"Yun ang quote for the day," tila natatawang saad ni Kapunan.
"Prosecution should really be one-sided. Yun ang task ng prosecution. The defense is also one-sided, because they have to prove the defense. So both sides should be one-sided," paliwanag pa ni Kapunan, habang hinihirit pang "quote of the day" ang mga naging pahayag ni Padilla.
Maki-Balita: Atty. Kapunan sa birada ni Sen. Robin na one-sided ang prosecution: 'Quote for the day!'
