15-anyos na suspek sa pamamaril sa Tacloban, sinampahan ng patong-patong na kaso!-Balita

15-anyos na suspek sa pamamaril sa Tacloban, sinampahan ng patong-patong na kaso!

Nasampahan na ng patong-patong na kasong kriminal ang 15-anyos na estudyanteng sangkot sa madugong pamamaril sa loob ng San Jose National High School sa Tacloban City.

Ayon kay Police Lieutenant Colonel Analiza Armeza, tagapagsalita ng Police Regional Office 8 (PRO-8), kinasuhan ang menor de edad ng tatlong counts ng murder, tatlong counts ng frustrated murder, at multiple counts ng serious physical injuries kaugnay ng insidente.

Ipinaliwanag ni Armeza na ang 15-anyos lamang ang isinama sa reklamo dahil siya lamang ang natukoy ng mga awtoridad na kumilos nang may discernment o sapat na pag-unawa sa kaniyang ginawa.

“Siya lang yung na-file-an ng complaint kasi under nga sa RA 9344, siya lang ang upon determination, na he acted with discernment, siya lang ang puwedeng ma-file-an ng complaint,” ani Armeza, sa panayam sa kaniya ng media.

Samantala, wala namang isinampang kaso laban sa 14-anyos na kasama sa insidente dahil saklaw ito ng mga probisyon ng Republic Act No. 9344 o Juvenile Justice and Welfare Act.

Sa halip, sasailalim ang mas batang menor de edad sa intervention program na nakalaan para sa mga batang nalalabag sa batas.

Kasunod nito, lumabas din ang resulta ng isinagawang paraffin test sa dalawang suspek.

Ayon sa pulisya, kapwa nagpositibo ang dalawang menor de edad matapos makitaan ng bakas ng gunpowder nitrate sa kanilang mga kanang kamay. Nagpositibo rin sa pagsusuri ang mga baril na narekober mula sa kanila.

Patuloy pa rin ang masusing imbestigasyon ng mga awtoridad upang matukoy ang buong detalye ng insidente na ikinasawi ng tatlong katao at ikinasugat ng iba pa.

Sa kasalukuyan, nasa kustodiya na ng City Social Welfare and Development Office (CSWDO) ang dalawang menor de edad habang isinasagawa ang kaukulang mga legal at rehabilitasyong proseso.

Matatandaang naganap ang pamamaril sa loob ng San Jose National High School sa Tacloban City, Leyte noong Hunyo 22, isang insidenteng nagdulot ng matinding pagkabigla sa komunidad at muling nagbukas ng usapin hinggil sa karahasan sa loob ng mga paaralan at pananagutan ng mga menor de edad na nasasangkot sa mabibigat na krimen.

Maki-Balita: Shooting incident sa Tacloban, pinagplanuhan umano nang isang buwan—PRO-8

Maki-Balita: ALAMIN: Ilang detalye sa likod ng kauna-unahang school shootout sa Tacloban City

Matutupad o maliligwak? Buod ng ikalimang SONA ni PBBM

Nag-umpisa sa ganap na 4:00 ng hapon ang ikalimang State of the Nation Address (SONA) ni Pangulong Ferdinand “Bongbong” Marcos, Jr. sa Batasang Pambansa Complex sa Quezon City. Simula pa lang, tinumbok na agad niya ang kontrobersiyal na isyu ng korupsiyon sa Pilipinas, partikular ang maanomalyang flood control projects. Narito ang ilan sa mahahalagang usaping nahagip sa ulat ng Pangulo....

Masusing pag-aaral, konsultasyon, panawagan ni Rep. Diokno sa Pax Silica

Ipinapanawagan ni Akbayan Party-list Rep. Chel Diokno sa pamahalaan ang masusing konsultasyon at pag-aaral bago tuluyang itayo sa Pilipinas ang Pax Silica, na inisyatibo ng United States Department of State para sa artificial intelligence (AI) at supply chain security. MAKI-BALITA: ‘Perwisyo o benepisyo?’ Mga dapat malaman tungkol sa Pax Silica Parte ng naging talumpati ni Pangulong...

‘It will bring quality jobs!' PBBM, aprub na sa Pax Silica?

Ibinahagi ni Pangulong Ferdinand “Bongbong” Marcos, Jr., ang ilan sa mga umano’y magiging benepisyo ng kontrobersyal na Pax Silica, sa kaniyang ikalimang State of the Nation Address (SONA) nitong hapon ng Lunes, Hulyo 27, 2026. Sa kabila ng mga protestang ikinakasa laban sa Pax Silica, mariing binigyang-diin ni PBBM ang epekto nito sa pagbibigay ng mas marami pa raw na trabaho sa mga...