Mariing kinuwestiyon ni dating Senate President Pro Tempore Loren Legarda ang umano’y pagtatangkang magpalit ng liderato sa Senado gamit lamang ang 12 boto nitong Miyerkules, Hunyo 3, at iginiit na labag ito sa Konstitusyon at sa umiiral na mga tuntunin ng kapulungan.
Matatandaang sa plenary session, iniluklok ng mga senador mula sa minority bloc kasama si Sen. Chiz Escudero mula sa majority bloc, si Sen. Win Gatchalian bilang bagong Senate President Pro Tempore at acting Senate President, matapos na hindi dumalo ang mga senador mula sa majority bloc.
Maki-Balita: Tawid-bakod na? Sen. Chiz, binulaga plenary session!
Sa inilabas na pahayag nitong Hunyo 3, sinabi ni Legarda na walang senador ang maaaring kumilos bilang Senate President kung wala ang kinakailangang mayoryang boto ng buong Senado.
Ayon sa kaniya, malinaw na nakasaad sa "Article VI, Section 16(1) ng 1987 Constitution" na ang Senate President ay dapat mahalal sa pamamagitan ng mayoryang boto ng lahat ng miyembro ng Senado.
‘12 is not 13, alam ng grade 1 'yan!' Sen. Pia, tinalakan bagong majority!
“Since the Senate is composed of twenty-four Senators, that majority is thirteen. By the fact that the Senators present did not have thirteen votes, they could not validly elect a Senate President or authorize any Senator to act as Senate President,” ani Legarda.
Ipinaliwanag din niya na maging ang iba pang pangunahing opisyal ng Senado gaya ng Senate President Pro Tempore, Senate Secretary, at Sergeant-at-Arms ay nangangailangan din ng hindi bababa sa 13 boto upang mahalal.
“Under Rule II, Section 2 of the Rules of the Senate, the officers of the Senate shall be elected by the majority vote of all its members,” aniya.
Binigyang-diin ng beteranang mambabatas na maging ang minority senators ay kinikilala ang pangangailangang ito, dahilan kung bakit hindi umano sila bumoto para sa isang Senate President.
“That is why the minority Senators did not vote for a Senate President: they lacked the required thirteen (13) votes,” dagdag niya.
Ayon pa kay Legarda, hindi maaaring magsagawa ng mga opisyal na aksyon ang Senado kung wala ang kinakailangang quorum.
“A majority of twenty-four is thirteen. Without thirteen senators present, the Senate cannot validly transact business. Without a quorum of thirteen (13), it is clear that no change of committee chairmanships can be done,” aniya.
Iginiit din niya na hindi dapat mabawasan ang representasyon ng mga halal na senador dahil lamang sa pansamantalang pagkawala o pagliban ng ilan sa kanila.
“The temporary absence of some members should not become a reason to lower their representation or weaken the mandate of the people who elected them,” sabi ni Legarda.
Dagdag pa niya, nananatiling bahagi ng buong miyembro ng Senado ang mga senador hangga’t walang legal na batayan gaya ng pagbibitiw, pagpapatalsik, permanenteng diskwalipikasyon, o iba pang kinikilalang dahilan sa batas.
Sa huli, nanawagan si Legarda ng mahigpit na pagsunod sa Konstitusyon sa gitna ng umiinit na usapin sa liderato ng Senado.
“We remain firm in our respect for the Constitution,” aniya.
Babala pa niya, anumang hakbang na isasagawa nang walang sapat na quorum ay maaaring kuwestiyunin ang legalidad nito.
“Any proceeding conducted without the constitutionally required quorum raises serious questions of validity and cannot be recognized as consistent with the clear mandate of the Constitution,” pagtatapos ni Legarda.
Maki-Balita: 'I'm still the legitimate, legal, moral Senate President!'—SP Cayetano
