Nanindigan si House Committee on Justice Chairman Gerville Luistro na wala silang nilabag na batas sa pagdinig ng impeachment complaints laban kay Vice President Sara Duterte.
Sa isang radio interview nitong Lunes, Abril 27, 2026, sinagot ni Luistro ang balak na pagsasampa ng kaso ng mister ni VP Sara na si Atty. Manases Carpio laban sa kaniya at ibang mambabatas.
“As far as the committee is concerned, we maintain the position that we did not violate any law,” ani Luistro.
Matatandaang noong Linggo, Abril 26, nang kumpirmahin ni Carpio na kabilang sa sasampahan niya ng kaso ay sina Akbayan Partylist Rep. Percival Cendaña, Akbayan Partylist Rep. Chel Diokno, at Mamamayang Liberal Partylist Rep. Leila de Lima, at ang ilang opisyal ng Anti-Money Laundering Council (AMLC) at Bangko Sentral ng Pilipinas (BSP).
KAUGNAY NA BALITA: Resbak ni hubby: Mister ni VP Sara, kakasuhan mga opisyal ng BSP, AMLC at ilang mambabatas!
Sen. Loren, niligwak na rin ng Kislap Diwa na pinangangasiwaan niya!
“I was constrained to seek legal action in defense not only of his wife VP Sara and the Duterte family, but more so in defense of the banking and financial community especially the unwary general public,” ani Carpio sa isang pahayag noong Linggo.
Iginiit din niyang mahigpit na pinoprotektahan ng batas ang bank records at hindi dapat isapubliko.
“There is no exception. The prohibition is absolute. That is what Congress itself enacted to preserve full security against any disclosure of any information or record obtained by the AMLC,” dagdag niya.
Ang hakbang ni Carpio ay kasunod ng inilahad ng AMLC sa pagdinig ng Kamara hinggil sa impeachment complaint laban sa bise presidente, kung saan iniulat ang umano’y “suspicious” at “covered” bank transactions na umaabot sa ₱6.77 bilyon na iniuugnay kina Duterte at Carpio sa loob ng halos dalawang dekada.
Sa naturang halaga, ₱4.425 bilyon ang pumasok sa kanilang mga bank account habang ₱1.554 bilyon naman ang lumabas. Mayroon ding ₱791 milyon na hindi matukoy kung inflow o outflow dahil sa limitasyon ng lumang sistema ng AMLC.
KAUGNAY NA BALITA: Higit ₱6B-covered at suspicious transactions ni VP Sara, mister kumpirmado!—AMLC
